Максим против сомнителните тендери: „Не уривавме режим за да ни се случи „DejaVu“
Објавено во: Македонија 22 Јули, 2018
Јавноста во последните два дена жестоко се противи и осудува неколку тендери.
Најгласно се зборува за контроверзниот тендер од 35 милиони евра за набавка на реагенси на министерството за здравство . Оттука лавината од реакции го поттикна и градоначалникот на општина Куманово Максим Димитриевски да реагира преку социјалните мрежи.
Тој пишува дека неговата партија не уривала режим за да им се случи „дежа ву“ и бара доколку 1 промил од обвинувањата на јавноста за тендерите се точни тогаш мора да се осудат и од нив самите.
„Ниту јас, ниту премиерот Заев, ниту сопартијците, симпатизерите и сограѓаните, уривавме режим, криминал, беззаконие, корупција, за да на сите нас ни се случува “deja vu”.
Доколку и 1 промил од овие тешки обвинувања за тендерите, грантовите... е точен, мораме да се свртиме кон нас самите, и јавно да ги осудиме и корегираме овие девијантни однесувања!
#ЖивотЗаСите нема да дозволиме да биде живот за некого или живот за мене бидејќи така многу лесно ќе преминеме на “темната страна”.
Политиката е како атлетика, штафета 4х100. Само еден од тимот да е послаб или немотивиран, целиот тим губи.
Јас не сакам ниту ќе дозволам да губи мојот тим - ГРАЃАНИТЕ на Македонија!“, пишува Димитриевски на Фејсбук.
Инаку фирма формирана во април годинава е единствена пријавена на тендерот тежок 35 милиони евра за набавка на реагенси. Се работи за голема набавка за наредните три години, која ќе овозможи биохемиските лаборатории да се сведат на само осум во државата, а крвта за анализа ќе се транспортира од еден во друг град.