Македонски фирми кои ги добија најголемите милионски кредити во 2018-та: Доминира трговијата и градежништвото
Објавено во: Економија 01 Февруари, 2019
...
Компаниите чија дејност е малопродажба во трговијата и градежништвото во изминатата 2018-та ги склучиле најголемите кредитни рамки за финансирање на нивните инвестиции со комерцијалните банки, според евиденцијата на пребарувачот при службените објави на договорите за залог.
Во трговијата доминираат ланците на маркети Веропулос и Тинекс - МТ кои засновуваат право на кредитни рамки, со тоа што првиот од минатата година може да подигнува рати од 16,4 милиони евра, а другиот има максимален износ на користење од 14 милиони евра од летоска. Тука е и Елкос груп, која има два шопинг-центри во Македонија а е во сопственост на еден од најпознатите косовски бизнисмени Рамиз Келменди. Од декември минатата година има договор за кредит-лимит во износ од 6.000.000 евра. Од оние кои исто така основна дејност им е трговијата тука е и Мак Аутостар, компанијата која го застапува Mercedes-Benz за Daimler и други автомобилски брендови, од средината на минатата година е заложен должник на износ на главница од 7.300.000 евра.
Во градежништвото Турмак, фирма-сателит на Џевахир Холдинг, додека ги гради проектот со висококатниците Џеваир скај сити, со хипотека од март обезбедува кај доверителот износ од 10.000.000 евра. Илинден АД Струга, подизведувач на Синохидро на автопатот Кичево-Охрид, заедно со фирмата за хотелиерство Уникат 2017 од Охрид имаат право на два одвоени кредити во вредност од 13,4 милиони евра. АД за изградба и стопанисување со станбен и деловен простор, кое гради социјални станови, од приватна банка добива право на 8,5 милиони евра во мај. Врз основа на нови анекси од стари договори проширување на кредитните лимити добива градежните гиганти Бетон до 30.000.000,00 евра, кој треба да се врати до 1 ноември.2021 година. а Гранит од пред точно една година може да „троши“ до 18.500.000,00 евра,
МГ Фешн, компанија поврзана и со градежништво и со трговија, која есеноска ја купи атрактивната паркинг-парцела спроти хотелот „Холидеј Ин“ во строгиот центар на Скопје за изградба на станбен и деловен комплекс, од јуни минатата година има договор за рамковен револвинг од 5.800.000 евра.
Ренова, компанија која исто така е поврзана со градежништвото, а поседува фабрики за производство на малтер и направи за негово нанесување во Џепчиште, Тетово и Битола како и на други места на Балканот, од доверителот добива 6.000.000 евра по извршената пописна листа на имот и опрема во март.
Во класичната металургија, Еуроникел, кој деновиве е регистриран како нов сопственик на Фени Индустри по завршувањето на стечајната сага со комбинатот, од мај има право на износ од 6 милиони евра
Од другите, странскиот инвеститор „Секе“, кој откупува македонски тутун и го преработува, од крајот на минатата година добива краткорочен кредит од 12 милиони евра. .
Макоил, во чија сопственост се бензински пумпи и катни гаражи, прави нов анекс на стар договор со лимит од 6 милиони евра.
Александар Кузмановски