Добивај вести на Viber
Меморандум за соработка во областите на трудот, вработувањето и социјалната политика потпишаа денеска министерот за труд и социјала Диме Спасов и министрите за социјална заштита и за здравство и труд на Естонија Хелмен Кит и Урмас Крусе.
Документот предвидува соработката во наредните три години да се одвива пред се во областа на вработувањето, развивање и имплементација на политики за вработување, социјалната заштита, односно развивање и имплементација на политики и мерки за справување со сиромаштијата и социјалната исклученост на лицата кои се доведени во каков било вид на социјален ризик.
Останатите области на соработка вклучуваат: заштитата на правата на децата, со посебен акцент на згрижување на децата со посебни потреби, системот на социјална сигурност, заштита при работа, еднакви можности на жените и мажите, како и активностите поврзани со започнувањето на водење преговори за членство во ЕУ.
„Овој меморандум е почеток на воспоставување силни врски и плодна соработка меѓу ресорните министерства и успешна реализација на проекти и иницијативи во наредниот период“, рече министерот Спасов.