Лиле: Катица бараше да ги затвориме предметите и Камчев да не оди в затвор
Објавено во: Македонија 09 Август, 2019
Во писмената реакција која денеска ја достави до јавноста обвинителката Лиле Стефанова, посочува и дека специјалната обвинителка во оставка Катица Јанева барала предметите да се затворат а осомничените да не одат во затвор.
Стефанова, прецизира дека им било наложено, најдоцна до 6 мај 2019 година, до Јанева да достават писмени извештаи за штетата во двата предмет што осомничените треба да ја платат на државата.
– Конкретно, додава, ни беше наложено, најдоцна до 6 мај 2019 година, до неа да доставиме писмени извештаи за штетата во двата предмет што осомничените треба да ја платат на државата, по што предметите „да бидат тука затворени“ и осомничените „да не одат во затвор“. Меѓутоа, јас и обвинителот Бурим Рустеми изготвивме писмени извештаи во кои покрај износите на штетата, ги наведовме и можните затворски казни согласно Кривичниот законик во случај на спогодување со јавниот обвинител. Дополнително, за предметот „Империја“ потенцирав дека е во многу рана фаза за евентуално спогодување и дека истрагата треба да продолжи во следниот период, вели Стефанова.