ЛАВРОВ: Русија ќе ја поддржи воената акција на Иран против Израел
Објавено во: Свет 15 Април, 2024
Русија дава поддршка на нападот на Иран врз Израел. Рускиот шеф на дипломатијата, Сергеј Лавров денеска изјави дека неговата земја силно ќе ја „одбрани и поддржи“ воената акција на Иран против Израел како „легитимна одбрана“ на состанокот на Советот за безбедност на ОН.
Лавров го изјави ова денеска во телефонски разговор со неговиот ирански колега Хосеин Амир-Абдолахијан, наведено е во соопштението на Министерството за надворешни работи на Иран.
Лавров изрази надеж за намалување на тензиите во регионот по одмаздничкиот напад на Иран против Израел, што се случи две недели по нападот врз иранскиот Конзулат во Сирија.
Лавров ги критикуваше земјите кои одбија да го осудат нападот врз иранскиот Конзулат во Дамаск, додавајќи дека Русија „не се сомневала“ дека Иран ќе одговори на тоа.
Лавров додаде дека Русија верува дека процесот на спроведување на оваа воена акција на Иран е „заснован на одговорен одговор со воздржаност“, се наведува во соопштението.
За нападот врз зградата на иранскиот Конзулат во Дамаск, што резултираше со убиство на седум ирански воени претставници, вклучително и висок командант на Корпусот на Исламската револуционерна гарда (ИРГЦ) за Сирија и Либан е обвинет Израел.
Русија е една од земјите што го осудија нападот, кој ги разгоре тензиите меѓу Техеран и Тел Авив.
САД, Велика Британија, Франција и Германија ги осудија нападите во одделни изјави во неделата, по што иранското Министерство за надворешни работи ги повика нивните амбасадори во Техеран да протестираат.
Американскиот претседател Џо Бајден за првпат јавно се осврна на нападот на Иран против Израел во текот на викендот, велејќи дека останува фокусиран на безбедноста на Израел и постигнување примирје.
Француското Министерство за надворешни работи денеска соопшти дека го повикало иранскиот амбасадор на средба за да го осуди нападот на Иран врз Израел.
Откако почна војната меѓу палестинската терористичка група Хамас и Израел лани на 7 октомври, руските власти во Москва ги примија претставниците на Хамас.