Добивај вести на Viber
Ќерката на кубанскиот претседател Раул Кастро, Мариела Кастро, истакнала дека Куба и понатаму ќе ги брани своите социјалистички принципи и нема да се сврти кон капитализам само поради тоа што прифатила нормализација на односите со САД.
„Народот на Куба не сака враќање на капитализмот“, рекла Мариела Кастро, пратеничка во кубанскиот парламент, отфрлајќи ја притоа можноста за слободен влез на американските компании во Куба.
Кастро навела дека понекогаш луѓето кажуваат дека Фидел Кастро и кубанските лидери се тврдоглави.
„Искуството нас, меѓутоа, не научи на нешто многу важно, а тоа е дека никогаш не треба да се одречеме од своите принципи“, рекла Кастро.
Откако Куба во средата го пушти на слобода американскиот хуманитарен работник, Ален Грос, за време на размена на заробеници со Америка, претседателот на САД, Барак Обама, во обраќање до јавноста најави обновување на дипломатските односи со Куба, како и крај на „застарениот пристап“ што подразбира ублажување на економските санкции и рестрикции за патување.
„Изолацијата не делуваше. Време е за нов пристап“, рекол Обама најавувајќи крај на полувековното непријателство.
Истовремено на јавноста и се обрати и кубанскиот претседател Раул Кастро кој ја поздрави новата тенденција во односите со САД.