ЌЕ КУРТУЛАТ ДОНЕСЕНИТЕ СПОРНИ ДУПОВИ - за Расадник планот уште не е донесен и сега е моментот да реагираат граѓаните

Добивај вести на Viber

Деталните урбанистички планови, како оној во Ѓорче Петров, за кои имаше големи протести и незадоволство од граѓаните во тие општини, нема да можат да бидат сменети со новиот Закон за урбанистичко планирање, кој е донесен и стапен во сила, ниту со новиот Правилник, кој денеска беше потпишан од новиот министер за транспорт и врски Благој Бочварски.

Како што рече Бочварски, правилникот е за ставање ред во урбанизмот. 

„Во него има строги регулации за донесување на урбанистичките планови, кои меѓу другото, предвидуваат и двојно гласање во советите на општините. Граѓаните мора да бидат вклучени при носењето на ДУП-овите. Со овој правилник се прави сериозна регулација на просторот, така што веќе преку урбанизмот нема да се врши узурпација на просторот“, нагласи Бочварски.

Но, на прашањето дали веќе донесените ДУП-ови ќе може да се сменат, министерот одговори дека донесените ДУП-ови се стапени на сила, и изгласани на советите. Тоа, според Бочварски, е последниот чекор.

„Овој правилник ќе важи за сите идни ДУП-ови“, рече Бочварски, нагласувајќи дека сепак, општините имаат ингеренции да ги менуваат дуповите.

За ДУП-от во Расадник, каде се предвидува изградба на 90-тина згради, Бочварски има информации дека планот уште не е донесен, и сега е моментот, вели, таму да реагираат граѓаните и тој да се усогласи со нивните потреби.

„Кога планот ќе биде усогласен, доаѓа кај нас на согласност, каде ние технички ја гледаме усогласеноста со законите, но не навлегуваме во ингеренциите на општините. Досега не дозволивме да поминуваат ДУП-ови на брза лента. Сега за овој план треба да се вклучи фелата и да се донесе најдобриот план за Расадник“, рече Бочварски.  

За законот за дивоградбите, пак, министерот кажа дека имаат реален проблем на теренот со овие објекти. 

„Нема како Влада да дозволиме проблемите да ги ставаме под тепих. Имаме сет мерки како овие појави да се искоренуваат. Првиот чекор е со сериозните казнени пенали од 50 отсто над вредноста отколку ако градбата се легализирала по нормален пат. Втор чекор е зајакнување на инспекциските служби и сериозни казни“, потенцира министерот.

Н.Н.Ф.