Добивај вести на Viber
Агенцијата за храна и ветеринарство вчера потврди дека опасната бактерија листерија била пронајдена во две мостри на колбаси произведени од домашни месни индустрии. Од вкупно анализирани 200 мостри, присуството на бактеријата досега е потврдено кај овие две, иако засега не може да се потврди дали тие ја предизвикале листериозата кај осум граѓани, од кои четворица починаа.
Имињата на двете компании кои пуштиле во промет производи со опасната бактерија засега не се откриваат. Министерството за здравство најави и кривична пријава против непознат сторител за овој случај.
Сега следува генетска типизација на мострите, која треба да биде готова до среда попладне на Факултетот за ветеринарна медицина, а дури потоа ќе се знае дали листериозата кај заболените лица била предизвикана токму од колбасите.
Инаку колбасите како производ не се опфатени со правилникот за контрола на готови производи за консумација, затоа што тие подлежат на термичка обработка со која се смета дека бактеријата би се уништила доколку ја има.
Последниот случај на листериоза беше потврден за вчера кај лице од Тетово, кое конзумирало печено месо, а не сувомени производи, како и млеко од домашно производство од животни кои ги чувал и од кое правел сирење од непастеризирано млеко.