„Катимерини“ го анализира договорот со Бугарија - ќе има ли притисок врз Атина?

Добивај вести на Viber

Владата во Скопје вчера ја објави содржината на Договорот за пријателство меѓу Македонија и Бугарија што претствува прво затворање на надворешен фронт на новата Влада на Зоран Заев, пишува денеска грчкиот весник „Катимерини“. 

Се наведува дека тоа е затворање на фронт со една од двете соседни земји на Македонија кои се членки на Европската унија. 

Во краток опис на Договорот, весникот пишува дека во документот се употребува уставното име Република Македонија. 

Грчкиот весник наведува дека Бугарија, меѓу другото, „ќе ја поддржи Република Македонија за добивање на покана за членство во НАТО согласно соодветните одлуки од средбите на врвот на НАТО“. 

„Оваа формулација и одговара на Атина затоа што јасно се однесува на одлуката од Букурешт, според која решавањето на прашањето за името е основен предуслов за влез на ПЈРМ во Северноатлантската алијанса“- пишува „Катимерини“. 

Осврнувајќи се на членот 12 во кој стои дека во рок од три месеци од влегувањето во сила на Договорот, двете земји ќе основаат Заедничка меѓувладина комисија, весникот пишува дека „тоа може да предизвика извесен притисок врз Атина“.