Каков преседан!!! „Гранит“ на 40 „заслужните“ менаџери, директори и раководители ќе подели награди од 455.000 евра
Објавено во: Економија 14 Мај, 2021
„Гранит“ по неконсолидираниот биланс 2020 година ја заврши со оперативна загуба. Добивката е резултат на дивидендата исплатена лани од акциите во „Комерцијална банка“. Во такви услови Управниот одбор предлага да се наградат четириесетина вработени (менаџери, раководители и директори) со 455.000 евра! А за повеќе од 4.000 акционери дивиденда да се исплати од претходни години и износ што е на половина од дивидендата за лани. Ќе помине ли ова на претстојното акционерско собрание?
Претстои ли ерупција на незадоволство на малите акционери во „Гранит“??? Ги има повеќе од 4.100 лица. Идниот петок треба да гласаат за предлогот на претседателот Страшо Милковски и неговиот управен одбор со кој сака со 455.000 евра да награди четириесетина директори и раководители меѓу кои некои се и членови на управниот одбор!! И тоа во услови кога лани „Гранит“ годината ја заврши со оперативна загуба, искажа профит само благодарејќи на финансиските приходи односно дивидендата од акциите во „Комерцијална банка“.
Таа добивка Милковски и неговиот управен одбор предлага да се подели на два дела. Едниот дел е награди на членови на управниот одбор, раководители и директори во „Гранит“ (нешто над 40 лица) и за нив е планиран износ од 455.000 евра. Другиот дел е добивка за реинвестирање во износ од 605.000 евра.
Управниот одбор на „Гранит“ предлага акционерите на претстојното собрание да поделат 751.000 евра од акумулирани добивки од претходни години. Тие пари се награда што треба да ја поделат повеќе од 4.400 домашни и странски правни и физички лица. Од нив повеќе од 4.100 се домашни физички лица. Наспроти нив се нешто повеќе од 40 лица (членови на Управниот одбор, директори и раководители) кои ќе поделат награда од 455.000 евра или по 11.300 евра во просек по лице. Не кажуваат дали меѓу наградените ќе има и крупни малцински акционери??? Дали е ова иронично? Некој да добие и награда и дивиденда,а друг само дивиденда?
Како ќе се гласа на претстојното акционерско собрание ќе видиме. „Фактор“ по повод овој преседан на управата на „Гранит“ побара одговори од Управниот одбор на компанијата и од раководството на „Сава пензиско друштво“ компанија која управува со Отворен задолжнителниот пензиски фонд „Сава пензиски фонд“ кој поседува 7,7 отсто од акциите во „Гранит“.
Управниот одбор на „Гранит“ не не удостои со одговор повеќе од 2 недели, непосредно по приемот на нашите прашања објави соопштение како образложение за нивниот предлог за наградување кое нема да го коментираме туку ќе оставиме да го прочитате и процените на следниот линк https://www.seinet.com.mk/Default.aspx?docID=55090 со наслов 04,05,2021 Образложение за одлуката за распределба на добивката.docx
Претставниците на „Сава пензиско друштво“ максимално транспарентно и во краток временски рок ни го доставија одговорот што го објавуваме во целост :
„Во моментот правиме Анализа на Предлог одлуките за гласање на Акционерските собранија на издавачите на хартии од вредност кои ги напоменувате. Нашиот став по овие Одлуки ќе биде презентиран на самите акционерски собранија за кои уредно се води записник кој е јавен документ и како таков достапен е за инвеститорската јавност. Како и секогаш, Сава пензиско друштво ќе изгради и заземе став на начин кој е во интерес на членовите и пензионираните членови на фондовите со кои управува. “