Каков криминал сторил странски инвеститор: Адеми не кажа ни збор за случајот

Добивај вести на Viber

Или креваат раменици или молчат. Една недела откако директорот на Управата за финансиска полиција сведочеше дека во земјава има голема странска инвестиција зад која стои криминал, директорите на Агенцијата за странски инвестиции и промоција на извозот и на Дирекцијата за технолошко развојни индустриски зони немаат прецизен коментар за случајот. Вулнет Адеми кој директорува во Агенцијата и кој е најповикан да одговори и покрај напорите, па и испратените писмени прашања, не сакаше да каже ниту збор за случајот. Одмолча и за тоа дали соработуваат со финансиската полиција и кој е нивниот став. Александар Младеновски, директорот  на Дирекцијата за слободни зони за Фактор изјави дека никој не се обратил до нив за да дадат какви било информации. Вели дека не мора да значи оти инвестицијата е во некоја од зоните.

„Не се обратиле, ама ако го сторат тоа ние ќе соработуваме. Ќе отстапиме каков било документ кој им е потребен, вели Младеновски.

Арафат Муареми во интервју кое Фактор го објави пред една недела тврдеше дека не може да соопшти сума и точни податоци, но дека работат на таков случај кој е поврзан со странска инвестиција.

„За брзо време ќе излеземе со уште еден случај кој како инвестиција е со поголеми размери и со милионски суми во евра како штета.  По завршувањето на истрагата ќе се уверите дека има и такви странски инвестиции кои се дојдени со една намера. Што повеќе да добијат и од државата и од другите фондови и да си отидат од Македонија, рече Муареми.

За случајот се молчи и покрај тоа што актуелната власт доста зборуваше на оваа тема пред промената на фотелјите но и после тоа. Анализа која ја објави Владата пред точно една година покажа дека Македонија за 10 години (од 2007  до 2017 година) за странските директни инвестиции издвоила 225 милиони евра. Во таа сума влегуваат кеш грантови за кои се издвоени 26 милиони евра, даночни и царински олеснувања од кои биле изгубени над 69 милиони евра, како и трошоци за привлекување на странски инвеститори кои изнесуваат 130 милиони евра. Се вработиле 20 илјди лица, а секое вработување во просек чинело по 11 илјади евра.

Во тој период во земјата влегле 25 компании кои вработиле вкупно 20 илјади лица. Доколку се подели бројката на потрошени пари за странските директни инвестиции излегува дека секој  работник Македонија ја чинел во просек по 11 илјади евра.

Сепак освен анализата до пред интервјуто немаше ништо во врска со инвестициите. Истрагата ќе покаже дали сепак има такви кои само го цицале државниот буџет и тоа на незаконски начин.