Добивај вести на Viber
Комбинатот „Југохром“ од Јегуновце уште не почнал да гради еко-систем и доцни со исполнувањето на обврските за обезбедување интегрирана еколошка дозвола, констатираше Министерството за животна средина.
Од вкупно 29 активности од Оперативниот план што требаше да го исполни комбинатот, шест воопшто не се започнати со реализација, меѓу кои и изградба на систем за отпрашување.
Со ова за компанијата станува речиси невозможно да го исполни дури и продолжениот рок за воведување на потребните еколошки стандарди, кој истекува на 31 октомври.
Токму воведувањето на системот за отпрашување вреден 10 милиони евра беше причина заради која „Југохром“ и „Макстил“ на 1 април бараа продолжување на рокот за да обезбедат А-интегрирана еколошка дозвола, која значи највисок еколошки стандард и драстично намалено загадување на животната средина.
Од Министерството не се прецизира дали по истекот на октомврискиот рок „Југохром“ ќе добие клуч на врата или само уште едно продолжување на крајниот термин за исполнување на законските обврски.
Комбинатот функционира со просечно производство од 5 до 5,5 илјади тони феролегури и спаѓа во групата на позначајни емитери на загадувачки супстанци. Во него се вработени 1.200 лица.