Јовановиќ најави дека се подготвуваат промени кај данокот на добивка
Објавено во: Економија 09 Ноември, 2017
Бранимир Јовановиќ, советник во Кабинетот на министерот за финансии, рече дека се размислува и се подготвуваат промени кај данокот на добивка.
Вели дека кај данокот на добивка има многу поважни работи, отколку прогресијата, односно дека стапката не е толку битна, колку што е важно како да се регулира намалувањето на даночната основица.
„Во програмата на Владата тоа не е ставено, но дефинитивно се размислува за промени и кај данокот на добивка. Воведувањето на прогресивен данок на добивка во моментов не е толку важно, како што се важни некои други работи кај него. Данокот на добивка е многу посложен од персоналниот данок на доход и заради тоа што компаниите имаат многу можности за намалување на основицата и за избегнување на т.н. повисока стапка и заради тоа прогресивниот данок на добивка не е приоритет кога се разгледуваат опциите за промена на данокот на добивка. Но, дефинитивно се размислува за промени. Не само што се размислува, туку имаме и препораки од меѓународни организации, и од стопански комори, што е можеби зачудувачки“-изјави Јовановиќ.
Тој не даде детали на кој начин тоа би функционирало.