Добивај вести на Viber
Полицијата го заврши својот дел од увидот, истрагата е во рацете на Јавниот обвинител, кој треба да каже дали има простор некој да се повика на одговорност за експлозијата во фабрката за пиротехника во Сопиште, вели министерката за внатрешни работи Гордана Јанкулоска.
„Истрагата за експлозијата во Сопиште ја води јавниот обвинител и претпоставувам тогаш кога ќе процени дека е соодветно ќе ги објави финалните резултати. Од аспект на полициската работа увидот е завршен и се што беше побарано од нас е направено. Доколку добиеме нови наредби ќе постапиме и понатаму“, рече Јанкулоска.
Таа не откри повеќе детали за можните прични за несреќата. Во инцидентот беа повредени четири лица, од кои три потешко. Едно од нив почина вчера, повозрасен работник на 59 години, не успевајќи да се избори со последиците на изгорениците кои заземаа 90% од неговата кожа.
Двата други повредени, маж на возраст од 27 години и една жена, и натаму се во животозагрозувачка состојба, од четвртокот кога експлодираше фабриката во која работеа. Според првичните информации на МВР, експлозијата била предизвикана од искра која зафатила лесно запаллива газа.