Груевски: Обидот за убиство на Тодоров не дојде случајно
Објавено во: Македонија 01 Јуни, 2017
Лидерот на опозицијата Никола Груевски на денешната прес конференција по повод неуспешниот напад врз екс министерот за здравство Тодоров, рече дека обидот за убиство не дошол случајно ниту пак без подготовка за атмосфера за тоа и дека неговата партија била под оган и удар од сите страни.
„Присебноста и брзата реакција во дел од секундата го спасија Тодоров од првиот истрел, а реакцијата на полицијата од вториот испукан куршум. Тие делови од секундата одлучија Тодоров да е жив“, истакна Груевски.
СДСМ, Заев, куп невладини организации и шарената револуција, според Груевски цели три години граделе атмосфера за ова денес да се случи и се со една цел СДСМ да дојде на власт и да се уништи ВМРО ДПМНЕ.
Груевски во продолжението на обраќањето продолжи да ја убедува јавноста дека врз ВМРО ДПМНЕ во последните години се фрлале разни етикети и лажни обвинувања и дека се манипулира со се што работеле, а со лажни информации се создавала хистерија.
„Се користеа сите методи за да не прикажат во најцрно светло. Денешниот обид за убиство не беше случаен, бил подготвуван“, тврди Груевски.
Тој потсети за пронајдената бомба во домот на родителите на Антонио Милошоски, и за испуканиот куршум во неговиот автомобил во 2002 година.