ГОЛЕМ ОГЛАС ЗА ВРАБОТУВАЊЕ ВО УЈП, СЕ ПРИМААТ 100 ЛУЃЕ - даночните власти велат: Причина е големиот број пензионирања

Добивај вести на Viber

Управата за јавни приходи планира да вработи наеднаш 100 луѓе. Огласот за тоа е распишан на веб страната на Агенцијата за администрација.

Во него се вели дека ќе се примаат 100 државни службеници во Управата за јавни приходи, за 79 работни позиции.

Ќе се примаат главно инспектори, даночни советници, соработници, асистенти. Платите се главно меѓу 28 и 38 илјади денари.

Во огласите е прецизно наведено кој за кое работно место какви услови ќе треба да исполнува, во смисла на образование, работно искуство, што треба да биде по националност и слично.

Фактор ја праша Управата за јавни приходи зошто наеднаш се потребни толку многу вработувања во даночната администрација.

Оттаму ни објаснија дека за сите овие вработувања е дадена потребната согласност од Министерството за финансии. Исто така, како што потенцираат од УЈП, поголем бил бројот на пензионирања од планираните нови вработувања, па затоа на даночната администрација сега и е потребен нов кадар.А, големиот одлив на кадар настанал, како што велат, и поради измените на Законот за работни односи, со кои не може да се продолжува работењето над 64 години со изјава на вработениот.

„УЈП ве информира дека јавниот оглас за вработување на 100 административни службеници во Управата за јавни приходи, е објавен врз основа обезбедена финансиска согласност на Министерството за финании и согласно донесениот Годишен план за вработување во Управата за јавни приходи за 2022 година, со кој се планирани 100 нови вработувања наспроти 110 пензионирања, иако досега се реализирани вкупно 124 пензионирања.Според ова, потребата за овие нови вработувања е утврдена врз основа на планираниот природен одлив за календарската 2022 година (предизвикан првенствено од измените на Законот за работните односи со кои се укина можноста за продолжување на работниот однос над 64 години возраст со изјава од вработениот), како  и согласно останатите индикатори за работната сила по години“, се вели во одговорот кој Фактор го доби од УЈП.

Целиот оглас можете да го погледнете тука.

Еве ги првите неколку позиции во огласот. Се бара даночен советник за правни и нормативни работи со високо образование од областа на правните науки и две години искуство во струката, кој ќе зема 36 и пол илјади денари и треба да биде Македонец.

Се бара и самостоен референт книговодител, за кој се бара више или средно и неговата плата ќе биде 18 илјади денари.

Има оглас и за асистент за управување со ризик кај усогласеноста, со плата над 33 илјади денари, помлад асистент за управување со ризик, со плата над 30 илјади денари, асистент за даночно сметководство, кој ќе зема над 33 илјади денари и слично.

Н.Н.Ф.