ГЕНЕРАТОРИ, СВЕЌИ, ПЛИНСКИ БОЦИ: Девет Украинци загинаа во обид да се загреат
Објавено во: Свет 30 Ноември, 2022
Украинските власти објавија дека во изминатите 24 часа девет луѓе загинаа во пожари во станови низ Украина.
Поради редовните прекини во снабдувањето со електрична енергија, Украинците се повеќе прибегнуваат кон употреба на генератори, свеќи и плински боци во своите домови, пренесуваат британските медиуми.
„Само во последните 24 часа во Украина се регистрирани 131 пожар, од кои 106 во станбени згради. Девет лица го загубија животот, а осум се повредени. Пожарите зачестија поради прекршување на правилата за заштита од пожари во станбени згради и употреба на несертифицирани уреди за греење и подготовка на храна“, стои во соопштението на украинските власти.
Ги повикаа граѓаните да внимаваат и да ги предупредат децата за ризиците. Руските сили уништија голем дел од енергетската инфраструктура во Украина, поради што има прекини во снабдувањето со електрична енергија.