„Фридом Хаус“: Македонија најлоша на Балканот во медиумската слобода
Објавено во: Мои пари 29 Април, 2015
Медиумските слободи во светот во 2014 се најниски во последните години поради рестриктивните закони и насилства над новинарите, оценува „Фридом Хаус“ (Freedom House) во годишниот извештај објавен во средата.
Најголем пад е забележан во Азербејџан, Ирак и Србија чиј премиер Александар Вучиќ е критикуван за непријателска реторика и притисок врз независните медиуми.
Белорусија, Крим кој го анектираше Русија, Иран, Туркменистан и Узбекистан се меѓу десетте земји во кои медиумската состојба е најтешка.
Што се случува на Балканот?
Нема да ви се верува но состојбата според извештајот е најлоша во Македонија каде медиумската слобода континуирано се ограничува во последните пет години.
„Неколку земји во Западниот Балкан и натаму се со загрижувачки тренд за кршење на слободата на медиумите во 2014 година. Состојбата на медиумите е обележана со неколку заеднички проблеми: користењето на законите за клевета и навреда од политичарите и бизнисмените за да се сузбие критичкото известување; провладина политика во јавните радиодифузни сервиси, притисоци врз уредници од страна на политичките водачи и приватните сопственици, што доведува до самоцензура; застрашување, закани и напади врз новинари за кои не се изрекуваат казни, како и нејасна сопственичка структура. Резултатот на Македонија опадна за 10 поени во изминатите 10 години, со што е најлошата земја на Балканот“, стои во извештајот.
Извештајот забележува за Македонија дека неколку „опозициски ориентирани медиуми беа затворени во изминатиот петгодишен период, а новинарот Томислав Кежаровски остана во притвор во 2014 година поради сомнителните обвиненија дека го открил идентитетот на заштитен сведок во случај за убиство“.