ФОТО: Во Битола под вода куќи, подруми, гаражи

Добивај вести на Viber

Локалните јавни претпријатија во Битола во соработка со граѓаните денеска ги санираат последиците од вчерашното невреме што го погоди овој град. Најпогодените локации во Битола ги посети градоначалничката Наташа Петровска и посочи дека Општина Битола ќе изврши обесштетување на семејствата кои претрпеле голема штета од поројниот дожд, пренесува МИА.

„За жал во текот на вчерашниот ден, краткотрајно но сепак драматично, Општина Битола ја зафати невреме. Но, веднаш, по првите повици, јавните претпријатија и Пожарната делуваа на терен, одржавме Кризен штаб и дадовме насоки за делување. Во текот на целата ноќ се расчистуваа критичните точки на терен, а она што следува во текот на денот е расчистување и дезинфекција која е значајна во овие околности, истакна Петровска. 

Екипите на битолските јавни претпријатија Водовод, Комуналец, Нискоградба и Паркинзи, заедно со екипите на ТППЕ Битола во координација со претставниците од Дирекцијата за зазштита и спасување и Центарот за управување со кризи, во текот на ноќта веднаш по обилните дождови реагираа во населбите Карпош, Јени Маале, на влезот во Битола М5 кај бензинската станица на Лук Оил, кружниот тек на Дулие, Горно Оризари, кај училиштето „Тодор Ангелевски“, на ул. „Дебарска“ во населбата Баир и на други локации по повик на граѓаните.

Фото МИА