ФОКУС НА ДЕНОТ: Ќе се постави знамето на НАТО и нови табли, морбилите ја земаа третата жртва
Објавено во: Македонија 11 Февруари, 2019
Знамето на НАТО од утре ќе се вее пред зградата на македонската влада, соопштија од прес-службата за медиумите. Токму поради оваа свечена манифестација се тргнати и буквите од натписот „Влада на Република Македонија“ од фасадата за да не се совпаднат истовремено и да не делува иритантно.
„Буквите од влезот на Владата (горе) се извадени во рамки на подготовките за употребата на новото уставно име на државата. Промената е направена рано утрово бидејќи во текот на денот предвидени се подготвителни активности на платото пред Владата за церемонијата на подигнување на знамето на НАТО пред Владата“, велат од Влада.
Портпаролот на Владата, Миле Бошњаковски, ги демантира информациите кои излегоа во јавноста дека расте револтот кај граѓаните и дека се исшкртани табли со новото уставно име Република Северна Македонија.
„Лажна вест е дека има исшкртани табли, новите табли не се поставени сè уште никаде“, напиша Бошњаковски на Твитер.
Нови табли ќе се поставуваат откако Владата во Службен весник ќе објави дека Грција ги ратификувала Пристапниот протокол за членство во НАТО и Преспанскиот договор.Соседна Грција ја испрати официјалната дипломатска нота со која ја информира нашата Влада за ратификацијата на Преспанскиот договор и Протоколот за НАТО.
Следниот чекор е објавувањето во Службен весник на датумот на стапување во сила на уставните измени и закон за промена на уставното име, односно од кога и официјално Република Македонија ќе почне да се именува како Република Северна Македонија.Во Скопје починало тринаесетмесечно дете со белодробни компликации откако претходно се заразило со мали сипаници. Информацијата ја потврдуваат од детската клиника.