Филипче: Луѓето се надвор, па и покрај контактите и прекршувањата на мерките, помала е веројатноста вирусот да се пренесе
Објавено во: Македонија 02 Септември, 2020
Има неколку причини зошто имаше во претходните денови намален број заразени и помалку пациенти кои се на болничко лекување, рече министерот за здравство Венко Филипче, во емисијата Само вистина на Канал 5 телевизија.
„Прво, сепак се луѓето надвор, и покрај тие интензивни контакти и прекршувања на правилата и мерките, помала е веројатноста вирусот да се пренесе. Затоа и стравуваваме од есенскиот период, кога луѓето ќе бидат во затворените простории.
И втората работа, тоа е нашиот пристап за интензивно тестирање, што значи дека се тестираат и контактите на заболените луѓе, што значи навреме да се откријат сите тие кои што се евентуално асимтоматски носители. Најверојатно 30 отсто од вкупниот број се асимптоматски носители. Тоа ни овозможува да имаме целосен увид во епидемијата.
Се уште не мислам дека намалените бројки се тренд. Значи, се намалуваат бројките, но не така нагло. Некои лаборатории за викенд не работат. Значи, добро е тоа, но не очекуваме нагол пад, значи сметам дека тие мали бројки беа исклучок“, рече министерот Филипче во своето телевизиско гостување.