Фијат сака да го добие Опел без пари

Добивај вести на Viber

Главниот извршен директор на Фијат, Серџо Маркионе е подготвен да купи европското одделение на Џенерал Моторс-Опел, ако се распадне соработката на компанијата со француската Пежо, јавува Ројтерс. И додека Опел бележи пад на продажбата, планот на Маркионе е да го добие "за без пари" за разлика од договорот за Крајслер или претходната понуда за Опел, направена во 2009-та година, се тврди во медиумите. Во 2009 година италијанскиот производител на автомобили доби удел во Крајслер во замена за пристап до технологија за производство на мали автомобили, наменети за американскиот пазар. Истата година таа упати понуда за привлекување и на Опел, но  Џенерал Моторс одлучи да ја задржи компанијата. Сепак Маркионе не се откажува од идејата за соработка со американскиот производител. Минатиот месец извршниот директор на Фијат, рече дека европската автомобилска индустрија има потреба од консолидација, ако сака да се справи со петгодишниот пад на пазарот. "Ние имаме колективна одговорност за индустријата, за да спроведеме прогресивно реструктуирање на европско ниво", рече тој. Во моментов од Фијат се уште не се упатиле понуда до Џенерал Моторс, пренесува Ројтерс и додава дека тоа ќе се случи само ако се распадне соработката меѓу Џенерал Моторс и Пежо. Во март двете компании почнаа партнерство што има за цел да им заштеди 2 милијарди долари трошоци до 2017 година. Загубите на Фијат во Европа се компензираат од профитот на компанијата на американскиот пазар, каде што имаат мнозински удел во Крајслер. Излезот на американскиот пазар овозможува нови бенефиции во Европа, посочува агенцијата.