Фероинвест: Менаџментот носи самостојни одлуки

Добивај вести на Viber

Менаџментот на компанијата Фероинвест тврди дека носи самостојни одлуки и повеќе нема никакви врски со поранешниот директор Кочо Анѓушев кој во меѓувреме стана вицепремиер за економија. 

Според нив согласно Законот за спречување на корупцијата и Законот за судир на интереси, сопственичката структура на „Фероинвест“ која ја сочинуваат содружниците не е во никаква незаконска консталација со управувањето на компанијата и со конкурирањето на сите тендери, информираше управителот на групацијата „Фероинвест“ Ратко Ѓорѓиоски.

– Секоја илузија на содружничката структура и на вицепремиерот Кочо Анѓушев ја сметам за злонамерна и излишна, рече Ѓорѓиоски и најави дека „Фероинвест“ не само сега туку и во иднина ќе учествува на сите тендери каде има деловен интерес и може да го оствари својот деловен потфат.

Управителот Ѓорѓиоски информираше дека „Фероинвест“ досега учествувал на повеќе вакви јавни повици за набавка на транспортни ленти кои ЕЛЕМ ги набавува за потребите на РЕК Битола кои се користат за ископ и транспорт на јагленот.

– И досега Фероинвест во конзорциум со странски партнер на повеќе пати добиваше значителен дел од предвидените лотови. Најчесто добиваше само еден дел за вакви транспортни ленти кој е строго специјализиран, а се работи за лотови чиј квалитет е однапред дефиниран за кои „Фероинвест“ понуди најниски цени, истакна Ѓорѓиоски и нагласи дека се неточни информациите дека последниот јавен повик го има добиено групацијата „Фероинвест“.

Денеска Антикорупциската комисија оцени дека согласно Законот за спречување на корупција, не постои судир на интереси во случајот со компанијата „Фероинвест“ чиј сопственик е заменик-претедателот на Владата Кочо Анѓушев, која учествувала на тендер во државната компанија за производство на струја ЕЛЕМ.

Комисијата оцени дека треба да се има предвид етичкиот и моралниот аспект на овој случај.