ДОАЃА ПОСТУДЕН ВОЗДУШЕН БРАН: Ќе има локални врнежи, а потоа и појава на утрински мразеви
Објавено во: Македонија 18 Март, 2024
Кон крајот на денов, а особено во текот на ноќта облачноста во земјава и регионот ќе се зголемува, што според метеопрогнозерот Славчо Поповски ќе резултира со локални врнежи од дожд во текот на утрешниот ден, но и снег на планините.
- Во текот на утрешниот ден ќе започне да дува засилен ветер од северен правец, со што од север ќе започне спуштање на постудена воздушна маса. Повремено ветерот ќе достигнува брзина од над 60 км/час, особено Долж Повардарието.
Ветерот ќе продолжи и во текот на ноќта кон среда, кога ќе започне и разведрување и повлекувње на облачноста во Македонија. Токму поради разведрувањето, и стабилизирањето на времето, во среда и во четврток на повеќе места низ Македонија се очекува појава на утрински мраз, кој секако особено лошо ќе влијае врз веќе расцветаните овошки.
Температурите во среда и во четврток во утринските часови ќе се спуштаат во интервалот од -5 до 3 степени, а на високите планински места тие ќе се спуштат дури и под - 5 степени - пишува Поповски на социјалните мрежи.
Воедно посочи дека максималните дневни температури на воздухот ќе бидат во пораст и ќе се искачуваат во интервалот од 11 до 18 степени, а најсвежо преку ден ќе биде утре кога максималните дневни температури ќе се искачуваат во интервалот помеѓу 7 и 14 степени.
Во Скопје и околината ќе имаме слично време, со повремен локален дожд во текот на утрешниот ден и со засилен ветер од северен правец.
Фото: Принтскрин/Инстаграм