Чифлиганец со демант по неговото име во снимката: Од секогаш сум помагал во согласност со законот
Објавено во: Македонија 09 Август, 2019
Градежниот инвеститор Ванчо Чифлиганец ги демантираше наводите кои произлегоа од новообјавената снимка денеска од страна на италијанската „ЛаВерита“. Во истата,бизнисменот Орце Камчев му вели на Бојан Јовановски, обвинет во случајот „Рекет“, дека Чифлиганец барал дуќан за стоматолошка ординација за обвинителката од СЈО, Лиле Стефанова, која го води случајот „Империја“.
„Во врска со новите објавени снимки од разговори, а што денес ги пренесуваат и македонските медиуми, сакам да ги известам медиумите и јавноста за следново:
Би сакал одговорно да и соопштам на јавноста дека таков наводен разговор во врска со некакво барање кон едно од лицата што се јавуваат во снимката, се нема случено, бидејќи, без исклучок, не сум таков човек кој влегува во такви разговори. Мојот животен пристап секогаш бил да помагам на луѓе во согласност со законските прописи. Без предметно е, дури и попатно споменување на моето име“, гласи демантот на бизнисменот.
Инаку Стефанова денеска изјави дека со бизнисменот биле лични пријатели и дека Камчев тоа го злоупотребил.
- Ниту сум барала, ниту некој нудел дуќан. Јордан Камчев ваквата изјава ја дава со цел да ме дискредитира, бидејќи е свесен дека самиот го снима разговорот со Бојан Јовановски и знае дека еден ден таа снимка ќе ја пушти и ќе се слуша, рече денеска Стефанова.