Бујар Османи со објаснување за критериумите од Бундестагот: Тие се добри за нас

Добивај вести на Viber

Вицепремиерот за европски прашања Бујар Османи објасни дека критериумите кои германскиот Бундестаг ги постави за Македонија непосредно пред изгласувањето на позитивна одлука за старт на преговорите со ЕУ не претставуваат ништо ново, односно не се нови условувања и дека тие се позитивни за нашата земја. Гласањето е закажано во 19.30 часот и се очекува германскиот парламент со апсолутно мнозинство да го одобри Датумот за преговори на Македонија со ЕУ.

„Во овој текст нема ништо ново од тоа што го предвидува самиот тек на преговорите, но сметам дека намерата на пратениците е да им укажат на скептиците дека ова ќе биде мониториран процес со многу условувања и само ако се исполнат условите ќе можат еден ден да станат членки на ЕУ“, вели Османи за Дојче Веле.

Според него, документот е одлична рефлексија на состојбите во државата и, како што вели тој, валоризација на тоа што сме го направиле во последните три години. Од критериумите објавени од Бундестагот суштината што може да се заклучи е дека Македонија нема да биде примена во ЕУ се додека целосно не ги затвори сите поглавја од преговорите.

Во нацрт-документот кој ќе биде ставен на гласање пред германските пратеници се наведуваат и критериуми на кои земјата ќе мора да продолжи да работи во текот на преговорите, а кои се дел и од процедурата која ја налага самата ЕУ. Меѓудругото: продолжување на реформските процеси, зајакнување на владеењето на правото и на борбата против организираниот криминал и корупција. Покрај тоа примарни би биле и темите темите за функционални демократските институции, реформа на јавната администрација, економски развој и конкурентност, добрососедски односи и регионална соработка, слобода на печатот и медиумите, права на најранливите групи и припадници на малцинствата и активно граѓанско општество.

Бундестагот бара од германската Сојузната влада во рамки на преговорите да обезбеди дека ќе се гарантира продолжување на реформите и дека земјава ќе мора да продолжи да вложува значителни дополнителни напори за исполнување на критериумите за членство. Се бара и Еврокомисијата и Европската служба за надворешни работи редовно да информираат за напредокот на реформите за време на пристапните преговори, како и Федерална влада, вклучително и од нејзините дипломатски мисии, се додава во документот.. Приоритет треба да бидат поглавјата 23 за правосудство и основни права и 24 за судство, слобода и безбедност со јасно утврдени рокови и цели, чие исполнување ќе биде предуслов за отворање нови поглавја.

Споредбата на предлог-одлуките за Северна Македонија и за Албанија што вечерва треба ги донесе Бундестагот покажува дека кај владејачките партии во Германија постои согласност дека земјава безусловно треба да добие датум за почеток на преговори на Европскиот Совет на 17 и 18 октомври додека од Албанија, за старт на преговори, се бара завршување на серија задачи.

Во предлог-одлуката за С. Македонија пишува дека Бундестагот дава согласност за германската влада на следниот Европски Совет да биде „за“ отворање пристапни преговори со земјава. Притоа нема никакви дополнителни услови до почетокот на преговорите.