БУГАРСКИ ФАКТОР ГИ КРИТИКУВА ВЛАСТИТЕ: Се лутат за изјавата на Тимчо Муцунски

Добивај вести на Viber

Бугарски „Фактор“ остро го критикува МНР на Бугарија и властите во Софија поради нереагирањето на изјавата на потпретседателот на ВМРО-ДПМНЕ Тимчо Муцунски дека е можно да се смени преговарачката рамка меѓу Скопје и ЕУ за да се одложи вклучувањето на Бугарите во Уставот на земјата.

„Ниту Министерството за надворешни работи, ниту претседателството не реагираат на неопределено одложување на промената, без која РСМ не би требало да ги продолжи преговорите за членство во ЕУ. Станува збор за предизборна манипулација направена од Муцунски, кој изјави дека „одложеното спроведување на уставните измени е легитимна алтернатива што ја нуди ВМРО-ДПМНЕ“, пишува Фактор.бг.

Весникот ја цитира изјавата на Муцунски која нагласи дека „од наша страна ќе бараме гаранции за македонскиот идентитет, јазик, но и гаранции дека нема да има билатерализација на евроинтеграциите“, со која навестува дека Бугарија нема да има право да ги штити своите интереси во текот на нивната интеграција.

Тој нагласи дека „ставот на ВМРО-ДПМНЕ за спорот со Бугарија е јасен, а тој е дека нема да има уставни измени во сегашните политички услови“.

Фактор.бг потсетува дека ниту идната влада на РСМ, ниту новата бугарска влада не би можеле да ја сменат преговарачката рамка со ЕУ, во која беше вклучен таканаречениот „француски предлог“ со вклучување на македонските Бугари во Уставот на земјата, а слични изјави се едноставно предизборни манипулации со цел враќање на ВМРО-ДПМНЕ на власт.

фото ЕПА