Бесплатно по невеста од Русија и Украина, а на општински трошок свадбата?!
Објавено во: Мои пари 21 Август, 2013
Градоначалникот на Македонски Брод загрижен поради се поголемиот број на ергени им нуди на момчињата од Поречието бесплатно патување до Русија и Украина за да си најдат невести и ветува свадби на општински трошок.
Во Македонски Брод некогаш живеаа 24 илјади жители. Денеска, тој број е трипати помал. Девојките најчесто заминуваат во град или во странство. Милосим Војневски, градоначалник на Македонски Брод кандисува над 200 стари ергени од Поречието да се оженат. Имале меѓу 35 и 50 години, а не формирале семејство. Преку невладина организација од Битола им нудат Русинки и Украинки, не постари од 35 години. Но, интерес нема, велат локалните власти во Македонски Брод. Досега се пријавиле само 4, а требаат најмалку 20 за да се формира група - на општински трошок да одат во Русија и Украина и да избираат невести. Општината ќе плати и за свадба и ќе издвои помош само работата да биде, објави за „Канал 5“. Младите од Поречието бегаат, девојките се мажат или во град или во странство. Општината некогаш имаше 24 илјади жители, а денеска 8.500. Од нив, шест илјади се во Македонски Брод, а другите две илјади во 50 села од оваа, најголема по територија општина во Македонија. Лани имало 49 новороденчиња, а умреле близу 100 луѓе. Во опстанокот на населението во селата, тврдат од општината, најголем придонес имаат невестите од Албанија. Ги има 68, кои родиле 192 деца. Скоро на старите ергени ќе им бидат понудени и други поволности во пари и развој на селскиот, планинскиот и спеолошкиот туризам, само бројот на жителите во Пречието да остане на сегашното ниво.