Добивај вести на Viber
Австрискиот канцелар Вернер Фајман се противи на проширувањето на санкциите против Русија и бара да се направат нови напори со цел изнаоѓање мирољубиво решение.
„Не можам да и дадам поддршка на еуфоријата која зафати голем број земји во ЕУ во однос на успехот на санкциите против Русија. Не гледам никаква причина за славење и не знам зошто би требало да се радуваме кога пропаѓа руската економија. И ние ќе си ја исечеме гранката на која седиме доколку кон руската економија изградиме нов ѕид“, предупредил канцеларот во интервју за виенскиот весник „Естерајх“.
Санкциите, според неговите зборови, биле само чекор за одбрана и како такви тие биле во ред, но целта никако не смее да биде понатамошно проширување.
Фајман пренел дека неодамна имал телефонски разговор со рускиот претседател Владимир Путин и во таа прилика предложил мировни преговори.
„Ние мора во наредните неколку години засилено да ја користиме нашата неутрална улога и да се залагаме за мировни преговори“, порачал тој.