АКЦИЈА: МВР заплени нелегално сечено огревно дрво

Добивај вести на Viber

Во акциски контроли од крајот на јуни досега, Министерството за внатрешни работи запленило над 1.000 кубни метри огревно дрво. На ден се запленувале во просек по три камиони нелегално сечено дрво за огрев. Во рамките на акцијата „Гора“, насочена кон сузбивање на криминалот поврзан со нелегална сеча на дрва, пустошење шуми и нелегална трговија со дрвна маса, биле контролирани 245 легални складови за огревно дрво ширум земјата, при што 49 од нив се затворени, објави министерката за внатрешни работи Гордана Јанкулоска. Од контролираните 31 правно лице лиценцирани за издавање одобренија за сеча на приватна шума, дури кај 21 субјект биле утврдени неправилности во работењето. „Досега се поднесени 10 кривични пријави (“кражба“, “фалсификување исправа“, “даночно затајување“, “злоупотреба на службена положба и овластување“ и “несовесно работење во службата“), како и 167 прекршоци“, посочи Јанкулоска. Вредноста на запленетото огревно дрво е проценета на над 36.000 евра. Меѓу поднесените кривични пријави има и такви против вработени службеници кои биле вклучени во криминалот со огревно дрво. Така, СВР Тетово документираше злоупотреби вршени од четворица вработени во шумска полиција и еден инспектор за шумарство кои неовластено вратиле околу 95 метри кубни дрва, кои предходно полицијата ги одзеде во акциската контрола на 24.06.2014 год., СВР Велес откри несовесно работење на тројца магационери во ЈП Македонски шуми“ кои дозволиле незконско продавање на дрвна маса во вредност од околу 72.000 евра, додека СВР Куманово мерки на кривичен прогон перзеде против директорот на подружницата на Македонски шуми во Куманово, поради незаконско присвојување на 6.500 евра од благајната на претпријатието и огревно дрво во вредност од 1.500 евра.