Добивај вести на Viber
Агенцијата за храна и ветеринарство воведува нови дополнителни превентивни мерки за исполнување на посебните барања за безбедност на храната со кои се забранува ставање во промет на храна од животинско потекло опфатена со Правилникот, а кои се однесуваат на микробиолошките критериуми. Мерките се воведуваат по појавата на бактеријата листерија, која беше детектирана кај осум пациенти, од кои четворица починаа.
По препорака на Министерството за здравство, Агенцијата почна постапка на измена и дополнување на Правилникот за посебните барања кои се однесуваат на микробиолошките критериуми за храна. Иако тој е усогласен со релевантното законодавство на ЕУ, сепак ќе се воведат постриктни критериуми во однос на бактеријата листерија.
Во наредните денови продолжува континуираната контрола на сите точки во ланецот на безбедност на храна кои се сметаат за ризични. Во случај на позитивни наоди од земените мостри, Агенцијата ќе нареди итно повлекување на спорните производи и ќе изврши задолжително информирање на граѓаните за евентуално спорните производи, информираат од АХВ.
Првичните наоди покажаа позитивни резултати за присуство на бактеријата листерија кај два примероци од колбас произведен во македонски фабрики, но името на производите и фирмите уште не се откриваат.