АХВ го демантира Трипуновски - Нашите вработени што беа во Италија се проверија и се потврди дека се здрави

Добивај вести на Viber

Агенцијата за храна и ветеринарство го демантира дополнителниот заменик министер за земјоделство, Цветан Трипуновски. 

„Во отсуство на идеи како да ја пополни дневната партиска агенда, во услови кога се преземаат сериозни мерки за спречување на ширење на вирусот Ковит 19, дополнителниот заменик министер за земјоделство, шумарство и водостопанство Цветан Трипуновски, продолжува да ја манипулира и заплашува јавноста. На дегутантна ‚прес конференција', денес информираше дека државава не прави ништо да се справи со Корона вирусот и дека вработени лица од Агенцијата за храна и ветеринарство, пред две недели се вратиле од службено патување во Италија, без да им биде направен преглед и тест за евентуално утврдување на присуство на болеста“, пишува АХВ.

Натаму, додаваат дека во целост ги демантираат на водите на Трипуновски.

„Ја информираме јавноста дека тројцата вработени во Агенцијата за храна и ветеринарство беа на службено патување во Италија и тоа во регионите кои тогаш не беа зафатени со Корона вирусот. По враќањето во земјава, тие целосно ги испочитуваа препораките на Владата. Од страна на вработените, доброволно, иако не доаѓаат од земји/региони каде тогаш имало присуство на болеста, направени се лекарски прегледи со кои е потврдено отсуство на вирусот, односно потврдено е дека тие се здрави“, велат од АХВ.

Оттаму апелираат грижата  за справување со Корона вирусот Трипуновски да им ја препушти на надлежните здравствени власти и „да престане да си поигрува со трпението и чувствителноста на граѓаните кога е нивното здравје во прашање“.