Агентка на ЦИА петте деца ги препознава по терористички настани
Објавено во: Свет 22 Септември, 2016
Џина Бенет, ветеран во службата на ЦИА, по долги години на посветеност на аналитичката работа во агенцијата открива интересни детали за тоа како е да се биде жена во безбедносниот систем. Таа има пет деца и сите ги препознава по значајни терористички напади бидејќи се родени непосредно по големи бомбардирања или пак била бремена додека траеле нападите.
Бенет во аналитичката служба на ЦИА ќе остане запаметена како агент кој прв поднел извештај за сомнителните активности на Осама бин Ладен на почетокот на 90-тите години кога тој се врти против САД, а ќе резултира со нападот на кулите „Близначки“ на 11 септември 2001-ва.
Агентката тогаш била бремена со нејзиното четврто дете, а петтата ќеркичка ја добила за време на војната во Ирак и нагалено ја нарекува „Фалуџа“. Работата на Бенет и уште 6 агентки наречени „Сестринството на ЦИА“ беше инспирација и за оскаровскиот филм Zero Dark Thirty за ловот и атентатот на Бин Ладен.