Добивај вести на Viber
Нова снежна покривка и ниски температури во повеќето балкански земји покажаа дека иако официјално пристигна пролетта, зимата нема така лесно да си замине.
Под снежна покривка утрово се разбуди главниот град на Босна и Херцеговина Сараево, а снег има на повисоките места во Хрватска и во Србија. Заради снегот кој паѓа од синоќа, денеска сообраќајот во поголемиот дел од Босна и Херцеговина е отежнат, особено на делниците низ повисоките планински предели.
Иако законската обврска за возачите во Босна и Херцеговина да носат зимска опрема заврши на 15 април, од сообраќајната полиција апелираа до возачите да не тргнуваат на пат без неа. Температурите во оваа земја паднале на седум степени под нулата.
Според метеоролозите, до крајот на неделата Балканот го очекува нестабилно и студено време со снег на планинските места.
Предвелигденскиот снег нема да ја одмине ниту Македонија. Во текот на ноќта и утре претпладне ќе има обилни врнежи од дожд, на повисоките места од дожд и снег, а на планините од снег. На повеќе места количината на наврнат воден талог ќе биде над 30л/м2, а на повисоките планини ќе се формира позначителна снежна покривка, предвидуваат метеоролозите.