ЗГОЛЕМЕНИ ПЕНЗИИ: Колку реално се задоволни пензионерите?
Објавено во: Економија 28 Септември, 2015
Најавеното зголемување на пензиите е обезбедено и од следниот месец пензионерите ќе добијат 621 денар плус.
Надлежните соопштија дека парите се обезбедени и пензиите ќе бидат исплатени навреме, а зголемувањето е буџетирано за 2016 г.
Но, колку реално пензионерите се задоволни од зголемените пензии?
Од Сојузот на здруженија на пензионери велат дека се задоволни од покачувањето на пензиите кое треба да почнат да го добиваат со исплатата на септемвриската пензија на 5 октомври.
Драги Аргировски вели дека зголемувањето е прифатено позитивно заедно со заедно со останатите проекти што ги спроведува Владата како бесплатен викенд, бањско климатска рекреација, бесплатен јавен превоз.
Нагласи дека предвиденото зголемување од 5% за наредната година ќе го подобри стандардот на пензионерите и ќе ја подобри нивната социјална и материјална сигурност а посебно стандардот на живот ќе им се подобри на пензионерите со пониски пензии кои ќе добијат подостоинствен живот
Од Партијата на Обединети пензионери тврдат дека владата манипулира . Велат дека зголемувањето на пензиите не е реално и дека е само манипулација за зголемување на рејтингот на владејачката партија.
„Владата на Република Македонија, без трошка совест, го воведе терминот „зголемување на пензиите“, само во функција на сопствен маркетинг, а го суспендира член 37 од Законот за ПИО, со кој се регулира редовното усогласување на пензиите. Вторпат, сака пензионерите „да ги преведе жедни преку вода“, во што, на општо изненадување – од само ним познати причини, добива поданичка подршка, од Сојузот на здруженијата на пензионерите (СЗПМ)” – стои во соопштението.
Од партијата објаснуваат дека Владата е должна двапати годишни да ги усогласува просечните пензи со просечната плата, и велат дека токму поради тоа ова покачување е само привидно.
– Владата и раководството на СЗПМ, наместо што манипулират со терминот „зголемување“ на пензиите на солидарна основа, нека одговорат зошто е суспендирано усогласувањето, колку просечно на годишно ниво би изнесувало редовното усогласување на пензиите, зошто во ФПИОМ нема доволно пари, дали пензиите се социјални примања, каков е соодносот на просечната пензија и плата и како тие, како „демократи и лидери со претприемачки дух“, на мала врата во Македонија ја вратија урамниловката од времето на комунизмот” – се вели понатаму во соопштенмието на ПОПГМ.
Од партијата ги повикуваат сите пензионери да се борат за нивните права и против нивната манипулацијата.