Добивај вести на Viber
По најавите дека со запирањето на проектот за гасоводот Јужен тек, се создава ново руско-турско енергетско партнерство, Брисел се обидува да влијае врз Анкара и да ја натера турската Влада да се откаже од поголема економска соработка со Москва.
Засега без успех поминуваат обидите на ЕУ да ја натераат Турција да не ја зголемува продажбата на свои производи во Русија и повеќе да се сврти кон Европа. Турскиот министер за енергетика Танер Јилгиз, пак, категорично изјави дека Турција нема да избира меѓу Русија и ЕУ.
„Турција настојува да го зголеми извозот на своите производи. За нас Русија е повеќе од сосед“, вели Јилгиз.
Според неофицијални информации, по средбата на рускиот претседател Владимир Путин и неговиот турски колега Реџеп Тајип Ердоган и потпишаната гасна спогодба меѓу двете земји, високата претставничка за заедничка надворешна и безбедносна политика на ЕУ Федерика Могерини се мобилизирала, ја посетила Анкара и отворено ја повикала Турција да биде „пријател на Брисел“.
Могерини побарала од Анкара да „не ја злоупотребува новонастанатата ситуација за сопствена корист“, мислејќи на фактот што по руското ембарго за увоз од европските земји, турските производи почнале да го заземаат местото на европските на рускиот пазар.
Таа дури се обидела да ја увери Турција да воведе санкции за Русија, или барем да извезува помалку, но за ова не добила потврден одговор од Ердоган.