Законот за јавно обвинителство влегува во Собрание без договор на власта и опозицијата
Објавено во: Македонија 27 Јануари, 2020
Законот за јавно обвинителство влегува во собраниска процедура оваа недела без претходен договор помеѓу власта и опозицијата. Во петокот имаше уште една неуспешна средба на работните групи, а од утре расправата започнува во парламентарната Комисија за политички систем за формирањето на јавното обвинителство за организиран криминал и висока корупција. Ова веќе го најави техничкиот премиер Оливер Спасовски, кој повика политичките партии да го поддржат.
На собраниската комисија ќе учествуваат и домашни и странски експерти, како и државниот јавен обвинител Љубомир Јовески, чие присуство го бараше ВМРО-ДПМНЕ како услов да продолжат преговорите. Тоа и беше причината поради која најголемата опозициска партија ја напушти средбата на партиските работни групи со министерката за правда Рената Дескоска во Собранието.
-Посебно сакам да ги повикам пратениците од парламентарната опозиција, од најголемата опозициска патија да престанат со партиски калкулации, со политиканство, со ставање на своите политички, лични интереси пред интересите на државата и конечно да се вградат во еден закон што ќе значи гарантирано зголемување на правдата, гарантирано зголемување на судството, на јавното обвинителство, од една страна и второ да помогнат барем еднаш сега да ги оствариме нашите интереси во делот на законот за јавно обвинителство и добивањето датум за почеток на преговорите, рече Спасовски.
Претседателот на владеачката СДСМ, Зоран Заев, веќе рече дека законот ќе се изгласа најдоцна до 11 февруари, пред распуштањето на Собранието и распишувањето на предвремените парламентарни избори и дека очекува двотретинско мнозинство за изгласувањето.
Министерката Дескоска рече дека во амандманите на опозицијата можно е да се кријат задни намери, а лидерот на ВМРО-ДПМНЕ, Христијан Мицксоки, најави дека неговата партија ќе учествува активно доколку се прифатат нејзините забелешки.
– Ако постои реална желба од страна на Владата да се прифатат забелешките на опозицијата кои се аргументирани фактички тогаш зошто да не го донесеме тој закон. Но, доколку не постои таа желба тогаш тоа е тоа, наведе Мицкоски.
Амбасадорите на влијателните земји-членки, како и европските челници кои неодамна ја посетија Македонија напоменаа дека, иако не е услов за евроинтеграциите, за Брисел ќе претставува добра порака изгласувањето на законот пред распуштањето на Собранието.