Заев не прифаќал ултиматуми и лидерска нема: Ќе се обрати во 14 часот
Објавено во: Македонија 19 Јули, 2019
Лидерската средба дефинитивнонема да се одржи. Од Владата објавија дека не се создадени услови за постигнување консензус за организирање на средба. Во соопштението стои дека Владата одбива да прифаќа ултиматуми од ако што велат, неодговорниот партиски претседател на ВМРО-ДПМНЕ кој според нив, заштитата на криминалот и заложбата за блокади и изолации ги става пред државните интереси за напредок на нашата земја.
„Претседателот на Владата на Република Северна Македонија, Зоран Заев, со иницијативата за лидерската средба покажа подготвеност да се прифатат сугестиите и предлозите за овие прашања, за да бидат вградени во програмските активности на Владата во претстојниот период, но нема да прифати ултиматуми кои единствено имаат за цел да го блокираат напредокот на Република Северна Македонија.
Стратешките интереси на државата, реформите и подобрувањето на квалитетот на животот на граѓаните, не смеат да бидат предмет на уцена на опозицијата. Националните интереси и правдата за граѓаните се неприкосновени и со нив нема и не смее да има компромиси, стои во известувањето.
Заев денеска во 14 часот ќе има јавно обраќање. На него како што известуваат од Владата, тој ќе информира за причините за одлагање на лидерската средба, како и за чекорите што се налагаат и ќе бидат преземени на патот на напредувањето на Република Северна Македонија.