Заев ќе чека избор на собраниски потпретседатели за да го достави предлогот за новата влада
Објавено во: Македонија 24 Август, 2020
Иако имаше најави дека е можно предлогот на новата Влада, мандатарот Зоран Заев да ја достави до Собранието денеска, тој во изјава за ТВ 21 вели дека тоа ќе го стори откако Собранието ќе ги избере потпретседателите. Со изборот на Јетон Шаќири од ДУИ за министер за информатичко општество и администрација во саботата впрочем беа комплетирани сите министрески места во новиот владин кабинет, но подоцна во текот на викендов се брифираше за некои рокади на местата најмногу на кадрите од ДУИ. Дали уште не е готово, не се коментира. Заев тврди дека само чека на изборот на потпретседателите.
„Прво парламентот мора да го утврди бројот на потпретседателите во парламентот и уште некои други одлуки, а исто така треба да го верифицира мандатот на следните пратеници кои доаѓаат од листите. Штом заврши Собранието со сите овие претходни постапки, веднаш ќе го доставам предлогот за влада и владината програма до парламентот, вели Заев.
Веќе пишувавме дека засега на веб страната на македонското Собрание не е закажана седница.
Финалниот рок во кој треба да биде поднесен предлогот за состав на новата влада е 2 септември.
Инаку внатрепартиските тензии во ДУИ впрочем стартуваа само ден откако беа објавени имињата за новиот владин состав. Се тврдеше дека Изет Меџити од Чаир се спротивставува на предлогот Артан Груби да биде вицепремиер и министер за политички систем. Подоцна се брифираше дека Меџити ќе ја добие таа позција, а Артан Груби ќе биде министер за надворешни работи за каде ДУИ го предложи Бујар Османи. Ќе има ли рокади не се открива.