Заев го пушти во употреба модернизираниот ГП Табановце
Објавено во: Економија 31 Мај, 2018
Надградениот и модернизиран граничен премин Табановце свечено е пуштен во употреба, со што се очекува да се олесни и забрза транспортот на стоки и патници, но и на регионалната трговија. Проектот чини 1,7 милиони евра, од кои 1,3 се европски пари. Проектoт се спроведуваше од јануари минатата година.
Табановце е еден од најфреквентните гранични премини во државата каде што се реализира 25 % од вкупниот број премини на товарни возила, каде што годишно поминуваат стотици илјади превозни средства и над четири милиони патници од и во Република Македонија. На настанот присуствуваа преставници од Владата, од Царинската Управа на Србија и други.
Градежите активности кои се спроведуваа во рамки на проектот финансиран од фондовите на Европската Унија, кофинансиран од Владата на Република Македонија има за цел да ја зголеми пропусната моќ на преминот за стокови пратки, за што се изградени две нови сообраќајни ленти, воведени се ефикасни контроли и современи стандарди во работењето на царинската лабараторија која целосно е опремена. На настанот кој е посветен на визибилност на поддршката на Европската унија за транспортните проекти во земјава, се обрати премиерот Зоран Заев.
“Го пуштаме во употреба новореконструираниот инфраструктурен капацитет на ГП Табановце, развиен според најмодерните и функционални стандарди за царинење и за олеснување на трговијата и контролата и ја стартуваме работата на интероперабилниот информатички систем на царинската управа со царинските информатички системи на ЕУ, односно ја носиме ЕУ, носиме високи стандарди на работа во нашата Македонија”, изјави Заев.
Компјутерскиот систем, ќе го подобри управувањето и контролата на транзитните постапки, ќе влијае на забрзувањето на царинските постапки и ќе овозможи поефикасен сервис кон граѓаните и бизнис заедницата.
“Република Македонија на патот на европската интеграција вложува големи напори за модернизација на транспртната инфраструктура која претставува занчителен придонес кон подобрувањето на економијата и трговијата, како на домашната така и на регионалната”, рече Заев.
Тој исткна дека Владата е насочена да ги модернизира сервисите за подобра услуга кон граѓаните.
Евроамбасадорот, Самуел Жбогар истакна дека на овој настан се означува и крајот на последната кампања „ЕУ за ВАС„ која се фокусираше на помошта на ЕУ во областа на транспортот. Новиот терминал посочи ќе помогне во олеснувањето на прекуграничната трговија долж Коридорот 10, што е најважната меѓународна рута низ земјата.
“Шеснаесет милиони евра помош од ИПА инструментот до националната Царинска управа до денес, од кои два милиони посветени на овој терминал, направија вистинско и мерливо влијание. Царината сега е повеќе реномирана и професионална институција отколку што беше во минатото”, изјави Жбогар.