Заев и Јанакакис зборуваа за македонско - грчка соработка на повеќе нивоа

Добивај вести на Viber

За можностите што ги отвораат политиките на пријателство и на соработка во духот на меѓусебно почитување, разговараше денеска премиерот Зоран Заев со амбасадорот на Република Грција во Македонија, Димитрис Јанакакис. 

Двајцата се согласиле дека е создадена позитивна атмосфера за градење доверба и за продлабочување на соработката меѓу Македонија и Грција, за што постои изразена волја од двете страни.

„Пративме позитивни сигнали за добрососедска соработка, затоа што новата Влада е определена кон примена на европските вредности и на политики на градење мостови. Добиваме назад позитивни сигнали од нашите соседи, што го сметаме за голем исчекор во развојот на добрососедските односи и во отворањето перспективи за граѓаните и за Република Македонија“ - вели Заев. 

Тој нагласи дека стратешки определби на нашата држава се членство на Македонија во Европската унија и во НАТО. Заев вели дека новата Влада е силно фокусирана кон потребниот реформски процес за евро-атлантските интеграции, преку усвојување конкретен Акциски план, што одразува колку сериозно е посветена Владата да го подигне квалитетот на живот на граѓаните и да обезбеди напредок на Македонија. Тој се надева  дека по Црна Гора, Македонија ќе биде следната земја, членка на НАТО.

Јанакакис покажал подготвеност за соработка меѓу двете земји на различни нивоа. Во таа насока, на средбата се разгледани и можностите, освен за унапредување на политичката клима на доверба, и за интензивирање на соработката меѓу Македонија и Грција на полето на економијата, инвестициите, културата, образованието, екологијата, туризмот и друго.