Војната ќе и зададе силен демографски удар на Украина

Добивај вести на Viber

Поради војната, Украина ќе претрпи големи демографски штети. Демографот Дончо Герасимовски вели дека во нормални околности, луѓето мигрираат поради повисоки плати, подобри услови за живот, но сега имаме присилно раселување. Објаснува дека од Украина ќе избегаат младите и работоспособните луѓе, а тоа понатаму ќе се одрази на недостигот на работна сила, но и наталитетот ќе се намали. Демографот додава дека во земјата ќе се создадат празни простори, во оние делови каде се војува и каде градовите се разрушени, а поради психолошкиот момент, и стравот, смета дека и во соседните региони и градови, ќе дојде до осипување на населението.

„Ако сакаме да ја видиме демографијата јас велам дека треба да ги фрлиме бројките во просторот, да видиме колку имаме младо население, мажи, жени, која е структурата на населението, степенот на образование итн. Секоја војна води до демографски промени, затоа што има убиени и раселени лица. Ќе замине млад, работоспособен и образован кадар, ќе останат постарите луѓе, а со тоа ќе се намали и наталитетот. Војните доведуваат и до одредени верски и етнички промени на структурата на населението“, вели Герасимовски.

Според објавените податоци, 6,7 милиони луѓе во Украина се внатрешно раселени. Европа очекува и до 8 милиони украински бегалци на кои ќе им треба засолниште. Голем дел од бегалците заминаа во Полска, Словачка, но и Германија, Шпанија и други земји. Над 2,1 милиони луѓе избегаа во Полска во последните три недели. Во Германија досега пристигнале околу 200.000 бегалци од Украина, главно жени и деца. Италија планира да смести стотици илјади луѓе во поранешните мафијашки имоти. 

Доколку овие луѓе најдат извор на егзистенција во некоја од споменатите земји, прашање е дали воопшто по завршувањето на војната би се вратиле во Украина, која и онака немаше добар стандард. Имаше и случаеви каде жени кои избегале од Украина, се породија во земјите кои им пружија засолниште. Многу од семејствата заминаа со мали деца.

Закрепнувањето од војните е долг процес. Ако го погледнеме примерот со војната во БиХ, таму по завршувањето на конфликтот, голем број граѓани се откажуваат од босанското државјанство, со цел да станат државјани на Германија, Австрија, Словенија. За 2 децении изгубиле над 90.000 државјани.

foto EPA