Во уште еден македонски град се воведува зонско паркирање
Објавено во: Економија 30 Јуни, 2018
Струга ова лето воведува наплата на паркинг, а речиси половина од расположливите површини за таа намена ќе бидат претворени во зони.
На многу места каде досега не се наплаќаше за паркирање на автомобили, тоа сега ќе биде задолжително. Со воведувањето на т.н зонско паркирање, градот ќе биде поделен на три зони. За паркирање ќе се наплаќа и на десната коловозна лента од сите главни и споредни улици во градот.
Според плнираното, во строгиот центар на градот првиот час паркирање ќе се наплатува по 40 денари. Вториот час ќе биде 30, а потоа цената ќе расте за нови 10 денари. За првата зона пак, стартот е 30 денари за првиот час, а за втората зона стартот е 20 денари.
„Со оваа одлука се воспоставува зонско паркирање и на споредни улици како што се Ѓуро Салај, Прва македонска ударна бригада и други кои се широки само 4 метри. Во членот 7 од одлуката е предвидено општината да може јавните паркиралишта да ги дава под концесија на други субјекти. Со тоа се јавува сомнеж дека истите ќе се даваат на луѓе блиски на власта“, рече Ален Деребан-советник ВМРО ДПМНЕ.