Во Грција тридневен штрајк поради новите мерки за штедење
Објавено во: Балкан 06 Мај, 2016
Синдикатите во Грција денеска ќе стапат во тридневен генерален штрајк, поради новите државни мерки за штедење.
Државните, општинските служби, но и многу приватни фирми, од носење на сметот до телевизиски вести, нема да функционираат или ќе работат со ограничен обем, а траектите нема да пловат кон грчките острови четири дена. Парламентот во недела би требало да гласа за Нацрт законот во врска со реформите на пензискиот систем. Законот предвидува поголеми издвојувања на вработените за пензиско осигурување. Работниците во комуналните претпријатија во грчката престолнина во четвртокот ги блокираа камионите за однесување на сметот и ги запоседнаа канцелариите на градските власти. Се очекуваат протести во Атина и другите поголеми градови утре и во текот на викендот.
Реформите се потребни за отклучувањето на нови средства од меѓународните кредитори.
Промените во пензискиот систем се дел од склучен договор со европските кредитори и ММФ за уште 86 милијарди евра спасувачки средства.