ВМРО-ДПМНЕ: Бислимовски е партиски функционер на СДСМ

Добивај вести на Viber

Oд ВМРО-ДПМНЕ обвинуваат дека Марко Бислимовски не е независен и професионален. 

Додаваат дека тој е партиски функционер на СДСМ, кој ги исполнува барањата и желбите на премиерот Зоран Заев.

„Бислимовски во 2011 година бил избран за член на Економско-социјалниот Совет на СДСМ, партиски орган и комисија. Бислимовски е партиско лице, и од таму не може да биде независен експерт кој ќе ги претставува граѓаните, туку партиски функционер кој се грижи за бизнис интересите на Заеви“, стои во денешното соопштение на ВМРО-ДПМНЕ.

Наведуваат дека Марко Бислимовски го крши законот за енергетика и чл. 17 ст. 5 од истиот, кој е дециден дека претседателот на Регулаторната комисија за енергетика не смее да биде функционер во политичка партија. 

ВМРО -ДПМНЕ оваа недела организираше два протести против поскапувањето на електричната енергија од 7.5 отсто. 

Повеќе протести досега организираа и граѓанските здруженија. Се протестираше и во внатрешноста на Македонија. 

Регулаторната комисија за енергетика ги информирала Секретаријатот на Енергетската заедница во Виена, како и дел од меѓународните дипломатските претставници во земјава во врска со последните случувања во земјава поврзани со нејзината одлука од 21 јули годинава за зголемување на цената на струјата, односно за одобрување на регулираниот максимален приход и цени на пресметковните елементи за вршење на енергетската дејност снабдување со електрична енергија на потрошувачи, кои ги снабдува универзалниот снабдувач ЕВН ХОМЕ ДОО Скопје.

По донесувањето на Одлука повремено се одржуваат протести во организација на собири на здруженија и граѓани, кои за РКЕ се легитимни, но протестот организиран од страна на најголемата опозициска партија ВМРО ДПМНЕ која бара укинување на одлуката е директен притисок врз нашата работа, велат регулаторите.