Владата се јавувала кај стечајниот управник за да ги смири вработените на „Охис“
Објавено во: Економија 21 Ноември, 2018
Владини претставници се јавувале кај стечајниот управник кој го води случајот со „Охис“ за да им пшотврдат на поранешѓните вработени дека ќе добијат дел од парите од продажбата на комбинатот.
Вицепремиерот Кочо Анѓушев, министерот за финансии Драган Тевдовски, министерот за инвестициската клима Зоран Шапуриќ и генералниот секретар на Владата, Драги Рашковски, остварија средба со претставници на поранешните вработени од Охис, кои штрајкуваа пред Владата незадоволни од спроведената стечајна постапка.
Владините претставници и претставниците на вработените констатираа дека стечајната постапка на Охис е завршена и спроведена од судските и стечајните органи, во процес во којшто Владата немала ингеренции и не била инволвирана.
„Согласно добиените информации од стечајниот управник, средствата кои се префрлени за купо-продажба на Охис, во периодот кој следи ќе се распределат на доверителите, каде што спаѓаат и поранешните вработени врз основа на донесени решенија на Судот за утврдени побарувања“, одговорија од Владата.
Вицепремиерот и министрите им порачаа на вработените дека Владата не се меша, ниту ќе се меша во судски одлуки, а по коментарите дека кај вработените постојат сомнежи дека во минатото се правеле злоупотреби на службената должност и се оштетувал имотот на Охис, а со тоа и имотот на државата, ги охрабрија сите евентуални злоупотреби и сомнежи да ги пријават и споделат со државните органи кои спроведуваат истражни постапки.
„Хемиски инженеринг", фирма од Скопје е новиот сопственик на дел од имотот на ОХИС, без имотот што досега бил продаден во извршни постапки. Цената платена за тој дел од имотот била 7,1 милиони евра, без ДДВ. Постапката на продажба ја водеа Собранието на доверители и стечајниот управник