Владата ќе има двајца портпароли
Објавено во: Македонија 02 Септември, 2020
Двајца портпароли ќе има новоизбраната влада - едниот ќе го предложи СДСМ, другиот ДУИ, односно ќе бидат на предлог на двете коалициони партии.
Моментално функцијата портпарол се уште ја врши Мухамед Хоџа кој беше избран во 2017 година, кога беше и избрана Владата на Зоран Заев. Тогаш истата функција ја вршеа заедно со Миле Бошњаковски кој две години подоцна замина во кабинетот на претседателот на државата Стево Пендаровски.
Оттогаш нов портпарол не беше предложен и Хоџа самиот ја вршеше функцијата и покрај тоа што владиниот тим за односи со јавноста сепак има и други членови. Не се исклучува можноста тој да оди на повисока позиција.
За персоналните решенија на подолните ешалони на власта се уште не си подале рака Заев и Ахмети, па затоа и не се знае кој на кое место ќе оди.
На вчерашаната седница беа определени замениците на премиерот но не и новиот генерален секретар на Владата.
На местото на Драги Рашковски доаѓа Дамјан Манчевски, но неговото назначување ќе биде по оставката во Собранието.
Допрва ќе се делат и директорските места.