Украдени златни предмети од Музејот на Македонија, вработените не знааат што се случило!

Добивај вести на Viber

Повеќе парчиња златни предмети, како од античкиот, така и од подоцнежниот период се украдени од Музејот на Македонија. Кражбата ја пријавиле вработените, но како што соопштуваат од МВР засега немаат точни сознанија што и како е украдено. „Случајот е пријавен во текот на вчерашниот ден и во моментов течат разговори со сите лица за кои сметаме дека можат да дадат повеќе информации. На прв поглед се чини дека се работи за прилично сериозен случај и оти недостасуваат вредни предмети. Меѓутоа, пред да се заврши конкретниот попис на предметите и да се направи споредба со она што стои во нивната евиденција и констатација за тоа што недостасува, ние не би можеле да излеземе со првична проценка во однос на вредноста на предметите кои недостасуваат и евентуалната направена штета“, изјави министерката Гордана Јанкулоска. Вработените не се сигурни кога точно е направена кражбата, а тоа не го открива ниту раководството на музејот. Она што се знае е дека златните предмети исчезнале од депото на Музејот. Според најавите, во полиција на информативен разговор ќе одат сите лица кои работат во Музејот. Увидот е во тек, потврдија од МВР од каде побарале Музејот да им даде попис на предметите од депото. Најавено е и формирање комисии за расчистување на случајот.