Добивај вести на Viber
Турската економија ги разочара аналитичарите остварувајќи раст од едвај 1,7% на годишно ниво, објави турскиот завод за статистика - ТУРКСТАТ.
„БДП на Турција во третиот квартал на 2014-та се зголеми за 1,7%, достигнувајќи цифра од 33,53 милијарди лири (11 милијарди евра), се наведува во соопштението.
Аналитичарите очекуваа економски раст од најмалку 2,8% во тој квартал во однос на истиот период лани.
Ваквите информации негативно се одразуваат на имиџот на турскиот претседател Реџеп Тајио Ердоган, за кого успехот на економски план да ја издигне Турција до сега беше еден од главните адути.
На Ердоган кој една деценија доминира со турската политичка сцена, му се припишуваат заслугите за пресврт во турската економија, во која БДП по глава на жител е речиси дуплиран во однос на 2002 година кога првпат дојде на власт.
Меѓутоа, во последните години, растот на БДП забавува заради послабата домашна побарувачка. Официјална Анкара во октомври ја намали прогнозата за растот на БДП годинава на 3,3 од претходно планираните 4%, а како причина за тоа ги наведе надворешните фактори, кризата во соседните Сирија и Ирак, но и неизвесноста во глобалната економија.