Турција прави висечки мост над Дарданелите
Објавено во: Балкан 26 Јануари, 2017
Проектот на Турција за изградба и управување на висечки мост над Дарданели го привлече интересот на 24 компании и ќе биде организирана аукција, пренесоа агенциите, повикувајќи се на претставник од Министерството за транспорт.
Неименуван извор, цитиран од агенцијата, прецизира дека тендерот ќе се одржи денеска, а до крајот на денот ќе биде соопштено името на компанијата победник.
Проектот е во вредност од 10 милијарди турски лири (2,62 милијарди долари).
Турскиот премиер Бинали Јилдирим изјави во октомври дека азиски и турски компании пројавиле интерес за проектот за мост, долг 3,7 километри. Објектот ќе се нарекува „Чанаккале 1915", а изградбата се очекува да започне на 18 март годинава, на годишнината од битката кај Галиполи за време на Првата светска војна, една од последните победи на Отоманската империја.
Според зборовите на премиерот изградбата на мостот ќе трае околу пет години.
Тоа е уште еден амбициозен инфраструктурен проект, кој треба да биде реализиран во време на владеењето на претседателот Реџеп Таип Ердоган. Во август беше отворен и еден од најголемите висечки мостови во светот над Босфор во Истанбул.